komdu að kasta!

Um félagið

Markmið Frisbígolffélags Reykjavíkur hafa ávallt verið að kynna íþróttina fyrir almenningi og efla frisbígolf á Íslandi. Við trúum því að með öflugu barna- og æskulýðsstarfi megi tryggja að frisbígolf dafni til framtíðar og um leið stuðla að bættri lýðheilsu.

Frisbígolffélag Reykjavíkur starfar í nánu samstarfi við Reykjavíkurborg við uppbyggingu frisbígolfsvæða og tilheyrandi aðstöðu á höfuðborgarsvæðinu. Félagið er aðildarfélag Íþróttabandalags Reykjavíkur og nýtur stuðnings ÍBR, Ungmennafélags Íslands og Reykjavíkurborgar í fjölbreyttum verkefnum.

Starfsemin

Félagið stendur fyrir yfir 150 viðburðum og mótum á ári, auk fjölbreyttra fræðsluviðburða, námskeiða og æfinga.

Frá vori fram á haust heldur FGR m.a. bikarkeppni, röð vikulegra reitaðra móta, Sólstöðumót, Silfur- og Gullmót og stórmótið Reykjavík Open. Ekki má gleyma vinsælum krakkanámskeiðum á sumrin. Og ekki er þá allt upptalið.

Yfir vetrartímann bjóðum við upp á regluleg skemmtimót, púttdeild fyrir fullorðna og æfingar fyrir börn í Breiðholtsskóla.

Rósin í hnappagatinu er Geisli, klúbbhús félagsins í Þorláksgeisla, þar er t.d. hægt að næla sér í kaffi og frisbídiska, eða bara setjast niður og spjalla.

Æfingar FGR

Frisbígolffélag Reykjavíkur býður upp á fjölbreyttar æfingar á mánudögum og fimmtudögum Æfingarnar henta jafnt þeim sem eru að stíga sín fyrstu skref í frisbígolfi sem og lengra komnum iðkendum.

Ef barnið þitt hefur áhuga á að prófa þessa skemmtilegu íþrótt er hægt að skrá það á æfingar í gegnum Abler.io. Þar sem Frisbígolffélag Reykjavíkur er aðili að Frístundakortinu gefst fjölskyldum jafnframt góður kostur á niðurgreiddum iðkendagjöldum.

Vikuleg púttdeild fullorðinna á fimmtudögum er auglýst á facebook síðu félagsins.