Bikarmótaröð FGR 2026
Keppnistímabilið stendur frá 8. mars - 27. september 2026 og lýkur með bikarmóti FGR 3-4. október.
Upplýsingar
Bikarmótaröð FGR er mótaröð á vegum Frisbígolffélags Reykjavíkur (FGR).
Bikarmótaröðin samastendur af vikulegum C-tier PDGA vottuðum mótum.
Tímabili Bikarmótaraðarinnar er skipt í Vordeild, Sumardeild og Jafndægurdeild, hver deild er 10 skipti. Tímabilinu lýkur svo með 2ja daga Bikarmóti sem einnig er C-tier. Sjá má áætlaðar dagsetningar vikulegu mótanna hér (Dagskrá birt með fyrirvara)
Keppt er til skiptis í Gufunesi og Grafarholti.
Tímabilið er frá 8. mars – 27. september 2026 og lýkur með bikarmóti FGR 3.-4. október.
Keppendur safna stigum gegnum sætaröðun í hverju móti, 6 bestu mót gilda til stiga í hverri deild. (Sjá nánar hér neðar)
Flokkar verða MPO/FPO, MP40/FP40, MP50/FP50, MP60/FP0, MA1/FA1 og MA3/FA3
Spiluð verða þrjú vallarskipulög, bláir, bláir/hvítir blandaðir og hvítir
Allir FGR félagar með gull- eða platínuaðild hafa sjálfkrafa þátttökurétt í Vor-, Sumar- og Jafndægurdeildinni. Þeir sem eru utan félagsins geta tekið þátt gegn föstu mótsgjaldi með millifærslu eða greiðslu uppi í Geisla en við hvetjum fólk til að skrá sig í félagið.
Þátttökurétt á Bikarmótinu fá svo þeir sem eru með virka félagsaðild í FGR, og keppt hafa samanlagt 5 sinnum á mótum í bikarmótaröðinni.
Skráning mun fara fram á Udisc og verður auglýst síðar.
Titlar og viðurkenningar
Til að geta orðið Deildar-, Klúbb- eða Bikarmeistari FGR þarf að vera skráður í félagið.
Deildarmeistarar Vordeildar, Sumardeildar og Jafndægurdeildar 2026: Breytt verður frá vananum undanfarin ár og í stað þess að veita verðlaun fyrir hvert þriðjudags og sunnudags pdga mót verða verðlaun veitt fyrir sigur hvers flokks í lok hverrar deildar fyrir samanlagðan árangur, 6 bestu mót telja til stiga í hverri deild. Taka þarf að lágmarki 4x þátt í flokki til að vera gjaldgengur til verðlauna og eingöngu er hægt að þiggja verðlaun í einum flokki í sömu deild. Við höldum síðasta mót hverrar deildar í Grafarholti og komum þá saman eftir mótið með verðlaunaafhendingu fyrir deildina og grilli í Geisla.
Klúbbmeistarar FGR 2026: Stigahæstu keppendurnir verða klúbbmeistarar í sínum flokki eftir samanlagðar deildir (sex bestu mót úr hverri deild gilda). Aðeins er hægt að verða klúbbmeistari í einum flokki, stig ganga ekki milli flokka að óbreyttu.
Bikarmeistarar FGR 2026: Þátttökurétt á Bikarmótinu fá þeir sem eru með virka félagsaðild í FGR og keppt hafa samanlagt 5 sinnum á mótum í Bikarmótaröðinni í hvaða flokki sem er. Flokkarnir á bikarmótinu eru þó einungis tveir; MPO og FPO.
Skráning og upplýsingar
Mót og deildir á vegum Frisbígolffélags Reykjavíkur (FGR) er hægt að finna á Udisc (Verður birt þar fljótlega). Skráningar á mót félagsins fara fram í gegnum UDisc. Þar geta leikmenn skráð sig til leiks, séð upplýsingar um völlinn, skilaboð frá mótsstjóra, meldað sig á mót og margt margt fleira. Haldið er utan um skor í PDGA appinu.
Stigagjöf og staða hverrar deildar
Staða í deild verður gefin út þegar hver deild er hálfnuð og fyrir síðasta mót í deild. Sigur í flokki á hverju móti gefur 100 stig, 2. sæti 90 stig, 3. 81 stig og svo frv. Bráðabani fer fram um fyrsta sæti á stöku C-tier mótum ef einhverjir eru jafnir í þeim, bráðabaninn sker úr um hver fær 100 stig, hver 90 og svo frv. en einnig hver fær skráðan PDGA sigurinn. Ef keppendur eru jafnir í öðrum sætum eftir 2. sætið, t.d. 2 jafnir í 4. sæti fá þeir báðir 72 stig en keppandinn á eftir þeim, sem er þá í 6. sæti fær 56 stig. Mest er hægt að ávinna sér 600 stig í hverri deild.
Ertu nýr PDGA keppandi?
Ertu búin að vera að keppa á skemmtimótum og langar að prófa PDGA mót? Náðu í Udisc appið og skráðu þig á mótið, lestu vel um/about í lýsingu viðburðarins þar. Passaðu þig að melda þig með því velja 'check in' í udisc minnst klst. fyrir mót. Það opnar fyrir meldingar (e. check-in) möguleikann sama dag og mót er. Þú þarft einnig að sækja PDGA appið sem heldur utan um skor á sjálfu mótinu. Við hvetjum nýliða til að hafa samband við mótstjóra tímanlega (a.m.k. daginn fyrir mót) og láta vita af sér, mótstjóri getur þá tekið tillit til þeirra er raðað er í holl og leiðbeint þeim. Við bendum nýliðum á að skrá sig til dæmis í flokkana MA3 'Mixed Amateur' eða FA3 'Female Amateur' þó aðrir flokkar geti líka komið til greina.